ഒരു നിമിഷം
(കവിത : സജീവ്കുമാർ ശശിധരൻ )
എഴുതുന്ന കവിതകൾ
പകരുന്ന നിറമതിൽ
നുകരാനിരിക്കുന്ന
ശലഭങ്ങളെ .
കാത്തിരിക്കൂ നിങ്ങൾ
ഓർത്തിരിക്കൂ എന്നേ
നിറമുള്ളപൂക്കൾ
ഞാനിനിയും തരാം .
കഴിഞ്ഞതുമല്ല
ഞാനെഴുതാത്തതല്ല
എൻ വഴികളിലൊക്കെ
മുള്ളുവീണു .
തൂത്തുകളഞ്ഞു
ഞാനെത്തുന്ന നേരത്ത്
ഓർക്കാതെ പോകുമോ
എൻ്റെ പാര്
ചായ
(കവിത : സജീവ്കുമാർ ശശിധരൻ )
നാട് തിളച്ചു
തുളുമ്പിതെറിക്കുന്നു
നിറമുള്ള കോപ്പയിലെ
ചായപോലെ .
ആറിതണുത്താലും
കൊള്ളുകില്ല .
ഏറെ തിളച്ചാലും
കൊള്ളുകില്ല .
പലരുചി ചായയെ
മോന്തികുടിച്ചിട്ട്
അവരുപറഞ്ഞു
രുചി ഒന്നുതന്നെ .
രുചി ചത്ത നാവിനെ
ഞാനെന്ത് ചൊല്ലുവാൻ
ചില തിള തുള്ളികൾ
ചെന്ന് വീണതാവാം .
ദിനം
(ചെറുകഥ )
ഒരു വെളുത്ത് വരയിട്ട പേപ്പർ മുന്നിൽ കൈയ്യിൽ കറുത്ത മഷിയിൽ ഹീറോ പെൻ . ചുറ്റും പത്തോളം പെൺകുട്ടികൾ എല്ലാവരും ഓർമ്മകളിൽ പരതുന്നു . കഥ എഴുത്ത് മത്സരം . പേര് കൊടുക്കുമ്പോൾ അറിഞ്ഞിരുന്നില്ല . ആണായി ഞാൻ മാത്രമായിരിക്കുമെന്ന് . മത്സരത്തിന് കയറുമ്പോൾ ആൺകുട്ടികളിൽ പലരും പറഞ്ഞു . " ഡാ , നീ എന്ത് എഴുതിയാലും കാര്യമില്ല . പെണ്ണെഴുത്തിലാ കാര്യം , മറിയാമ്മ ടീച്ചർ വെട്ടി വെയിലത്ത് വെയ്ക്കും "
മറിയാമ്മ ; ആൺകുട്ടികളുടെ പേടിസ്വപ്നം . വേണ്ടായിരുന്നു , ഞാൻ എന്ത് എഴുതിയാലും അവർ വെട്ടും . വരകൾ നിറഞ്ഞ പേപ്പർ എന്നെ നോക്കി കളിയാക്കി . 'ദിനം 'എന്ന വിഷയം മറിയാമ്മ ടീച്ചർ ബോർഡിൽ എഴുതിയിട്ടു . " മുപ്പത് മിനിറ്റ് സമയം " ടീച്ചർ പറഞ്ഞു . പിന്നെ എൻ്റെ അടുത്തേയ്ക്ക് വന്നു , ചിരിച്ചു . " ആ നീയുമുണ്ടോ ? " , ഞാനും ഒരു ചിരിവരുത്തി . ചുറ്റുമുള്ള തരുണീമണികളെ ഒളികണ്ണിട്ട് നോക്കി . എല്ലാരിലും ഒരു പുച്ഛഭാവം . ഞാൻ എൻ്റെ ചിന്തയിൽ തിരഞ്ഞു . ഒന്നുമില്ല . രാവിലെ വീട്ടിൽ നിന്നിറങ്ങുമ്പോൾ അച്ഛൻ പറഞ്ഞ കാര്യം ഓർമ്മവന്നു . " വിഷയം ചുറ്റിലുമുണ്ട് . ഒന്നും കിട്ടിയില്ലേ നിനക്ക് ഇന്ന് നടന്ന കാര്യങ്ങൾ ഏഴുതിവെയ്ക്ക് , ഒന്നും എഴുതാതിരിക്കരുത് ." ഇതാണ് എൻ്റെ ദിനം , നിങ്ങൾ വായിക്കുന്ന ഈവരികൾ . ഈ നിമിഷം . ഇനി ഞാൻ എൻ്റെ പേര്കൂടി എഴുതി ചേർക്കുമ്പോൾ ഈ ചെറുകഥ പൂർത്തിയാകും . വെട്ടിയെറിഞ്ഞാലും ഇല്ലെങ്കിലും .
സജീവ്കുമാർ ശശിധരൻ
ഒരു വിളി :
കവിത : സജീവ് കുമാർ ശശിധരൻ
കവിതയായ് മൂളി നിന്നെ
കൂടെ ഞാൻ കൊണ്ട് പോകാം .
കരിവള വാങ്ങിത്തരാം , പെണ്ണേ
കടലും കടന്നു പോകാം .
പ്രണയമറിയാത്തവർ
പ്രാകൃതചേഷ്ടയോടെ
പലതും പറഞ്ഞിടുമ്പോൾ, പെണ്ണേ
പതറണ്ട ഞാനുണ്ടടോ .
നീണ്ടു നിവർന്ന് ലോകം
നിൻ്റെ മുൾമുനപോലുള്ള ദേശം
താമസ്സമെന്തു പെണ്ണേ
നമ്രത വേണ്ട പോരൂ .
കൂരയും കുടിയനും
കവിത : സജീവ്കുമാർ ശശിധരൻ
മാനമിരുളുന്നുണ്ട്
മേഘം ആറിത്തണുക്കണുണ്ട് .
നേരമുരളണുണ്ട് .
നേരം പോയ കാറ്റും പറക്കണുണ്ട് .
മിന്നലടിക്കണുണ്ട്
കൂടെ കൂടെ മദ്ദളകൊട്ടുമുണ്ട്
കാലെൻ്റെ ആടുന്നുണ്ട്
പാതിയെന്നെ കോപമായി നോക്കണുണ്ട്
ആടിക്കളിക്കണുണ്ട്
കൂര രണ്ട് മോന്തിയപോലെയുണ്ട് .
കോപമായി നോക്കണുണ്ട്
കൂര വീണാ നാളെയെൻകാലനുണ്ട് .
എൻ്റെ ഭയം
കവിത ( സജീവ്കുമാർ ശശിധരൻ )
മാട് ചവച്ചിറക്കും
വീണ്ടും തിന്നും
ആള് അയവെട്ടുമോ
കേളൻ ചിരിച്ചുവെന്നാൽ
പോഷകൻമാർ
പാഷാണവുംകഴിക്കും
ആളുകളേറെയുണ്ട്
വിഡ്ഢിപ്പെട്ടി
കീറി നീറി ചിലയ്ക്കും .
നാവ് നീളെപറഞ്ഞാൽ
മാളോർക്കെന്ത്
നാല് നാളിൽ മറക്കും .
ആതുര വേളയിലും
ആനന്ദിക്കും
ആർത്തിപിടിച്ചകൂട്ടം
കാണുന്ന കണ്ണുകളിൽ
നാളെയല്ല .ഇന്നിൻ്റെ
ഭീതിയാണ് .
വീട് കരഞ്ഞുപോയാൽ
പിന്നെ പിന്നെ
നാട് കരിഞ്ഞു പോകും .
നാടേ കരിഞ്ഞുപോയി
പിന്നെയെന്ത് രാജനും
രാജവാക്കും .
എൻ്റെ അക്ഷരങ്ങൾ
( കവിത : സജീവ്കുമാർ ശശിധരൻ )
കാലമൊരു കാപട്യ
ചിരി വരച്ചു .
ഉലയുന്ന വീടിനോ
തീ പിടിച്ചു .
നോവുകൾ വേവുന്ന
ഓർമ്മയുടെ മരുഭൂമി
അക്ഷരം തന്നുപോയി
ഞാൻ വിളമ്പും
അക്ഷരത്തുള്ളിയാൽ
അമ്മാനമാടുന്ന
അരയർക്കുനൽകുവാൻ
ഞാൻ ചരിച്ചു .
കടലുകാണാൻ വന്ന
ഇടയൻ്റെ കൗതുകം
കടലു കൊള്ളാമടോ
മീൻപിടിക്കാം .
അക്ഷര മുത്തുകൾ
ഏറെ പണിപ്പെട്ട്
അർത്ഥത്തിലാക്കി
ഞാൻ അരയനായി .
സ്രാവുകൾ വാളകൾ
അറിയാത്ത മീനുകൾ
വലപൊട്ടി അരയന്നു
ക്ഷീണമായി .
അക്ഷരി വരും .
വാക്കുണ്ട് ,വലകെട്ടും
വക്രതയല്ലഞാൻ
തളരില്ല ഞാൻ
അതിഥി
കവിത : സജീവ്കുമാർ ശശിധരൻ
നാടുകാണാൻ വന്നു വേനൽ
നാട് നീങ്ങി പോണു മാളോർ
നാണമില്ലന്നോത്ത് കേട്ട്
മാരിയെങ്ങോ പോയതാണ് .
മാരി വേണം ,വേനൽ വേണം
വന്നു പോകാൻ ഊരു വേണം .
വന്നുനിന്നാൽ ഓർമ്മ വേണം
വിരുന്നുകാരേ പോയിടേണം .
പാതകൾ
(കവിത : സജീവ്കുമാർ ശശിധരൻ )
നേരമില്ലാത്തതാ
എൻ്റെ നേരം
കാരണം ചൊല്ലുവാൻ
ഒന്നുമില്ല
കാടാണ് ,മുള്ളുണ്ട്
പഥിതനായി ഏകനായ്
കാത് കേൾക്കും വഴി
പോകുന്നു ഞാൻ .
കൂക്കുവിളി വന്നെൻ്റെ
കാതിൽ മുഴങ്ങി .
നിറമുള്ള സന്ധ്യ
ഇതളറ്റു വീണു .
ഇരുളോ ഭയം ചൊല്ലി
ഇടവഴിമറച്ചു .
കടലാണ് കാട്
കണ്ണാണ് കാത് .
മിന്നാമിനുങ്ങുകൾ
കൂട്ടമായെത്തി .
മിന്നിത്തിളങ്ങിയെൻ
മുള്ളുള്ള പാത .
കണ്ണൂ തിരുമി ഞാൻ
നോക്കുന്ന നേരം
കണ്ടുമിഴിച്ചു പോയ്
ആയിരം പാത .
ആകെ വശംകെട്ട്
കാതുകൂർപ്പിച്ചു .
കാതതോ ചൊല്ലി
നേരുള്ള പാത .
വ്യാപിയുടെ വായ്പ്പ
കവിത : സജീവ്കുമാർ ശശിധരൻ
നേർച്ചകളൊരുപാട്
ചെയ്യ്തുതീർക്കാനുണ്ട് .
വാക്കുപറഞ്ഞുഞാൻ
കാത്തിരിപ്പൂ .
കാര്യം നടന്നാലുമില്ലെങ്കിലും
കടം , കതിരോൻ്റെ മുന്നിലാ...
ഓർമ്മവേണം .
വാമമിടർച്ചയോടോതുന്നു
പരിഭവം .
കതിരവൻമാരിന്നെവിടയാണോ ?
തരിശുപോൽ ജീവിതം
മഴയും വരുന്നില്ല
പതിയാണ് പരിഭവം
കേട്ടുതീർക്കാം .
തോഷകനായിടാം ,
നേർച്ചനടത്തിടാം
ഭവതിക്കുമനശാന്തി
വീണുകിട്ടും.
കൂട്ടത്തിലെന്നുടെ
വാശിനടന്നിടും
ഭഗവാനിനിയെൻ
കടക്കാരനാ ...
ഒഴുക്ക്
സജീവ്കുമാർ ശശിധരൻ
നാവു പിഴച്ചുപോയാൽ
കാലങ്ങളാ നോവ് നിനച്ചിരിക്കും
നീളുന്ന മൺവഴിയിൽ
മഴവന്നാൽ ആകെ നനഞ്ഞിരിക്കും
വീടുകരഞ്ഞിരുന്നാൽ
നാടിനെന്ത് , നാട് നടന്നു പോകും .
നീയും മടിച്ചിരുന്നാൽ
നിന്നെ വിട്ട് ഞാനും കടന്നുപോകും .
കാടും നാടും
( കവിത : സജീവ്കുമാർ ശശിധരൻ )
കാടുകരഞ്ഞു
കരിഞ്ഞുണങ്ങി
നാട് ചിരിച്ചു
ചരിഞ്ഞുമെല്ലെ .
ഭാരം
( കവിത : സജീവ്കുമാർ ശശിധരൻ )
മരണത്തിനൊരു
സുഖമുണ്ടെന്നാരോ പറഞ്ഞു .
മരിച്ച വരല്ല .
മരണം കാത്തുകിടപ്പവർ .
ചിരി വന്നുവെങ്കിലും
സത്യമല്ലേ
പരസഹായം ഒരു
ഭാരമല്ലേ .
വയർ കീറിവന്നിട്ട്
ഒക്കത്തിരുന്നിട്ട്
പരസഹായം
ഭാരമെന്നോതീടണോ .
കാലമതങ്ങനെ
ഓടിടും കൂട്ടരേ
കാലൻ വരുംവരെ
പോയിടാടോ .
ജന്മമൊരു സത്യം
മനസ്സുമതു പോലെ
മുടി ചലിച്ചില്ലേൽ
മനസ്സിൽ ജീവിക്കാം .
വായന ( ലേഖനം )
സജീവ്കുമാർ ശശിധരൻ
പണ്ട് വായന ഒരു ഹരമായിരുന്നു . അത് തുടങ്ങിയത് ആറിൽ പഠിക്കുന്ന സമയത്താണ് . പിന്നെ വർഷങ്ങൾക്കുശേഷം എഴുതുക അല്ലെങ്കിൽ എഴുതണം എന്ന ആഗ്രഹം എവിടെ നിന്നോ പൊട്ടിമുളക്കുകയായിരുന്നു . ഇപ്പോഴും ഞാൻ വിശ്വസിക്കുന്നത് ആ പണ്ടത്തെ വായനയാണ് എനിക്ക് എഴുതണമെന്ന ആഗ്രഹമുണ്ടാക്കിയത് . ഇപ്പോഴും ദിവസവും ഒരു പേജെങ്കിലും വായിക്കും . അതുപോലെ ആദ്യം എഴുതിത്തുടങ്ങുമ്പോൾ എങ്ങനെ ?എന്ത് ശൈലിയിൽ എഴുതും എന്നൊരു അങ്കലാപ്പുണ്ടാവും , ഒരു വലിയ പ്രശ്നമാണത് , എന്നെ അതിൽ നിന്നും മോചിതനാക്കിയതും വായനയാണ് . വായന നല്ല എഴുത്തുകാരെ ഉണ്ടാക്കും . എല്ലാം വായിക്കുക , അത് നിങ്ങളെ നല്ല എഴുത്തുകാരനാകാം ,നല്ല വ്യക്തിയാക്കാം , നല്ല നിരൂപനാക്കാം . പുതിയ ഒരുപാട് ചിന്തകളുണ്ടാക്കാം . വായിക്കുക നല്ലതിനെ ഉൾക്കൊണ്ട് , ചീത്തയെ തള്ളി .
പിന്നെ ഒന്നുകൂടിയുണ്ട് എഴുത്തുകാരൻ നല്ലെരു വായക്കാരനായിരിക്കണമെന്ന നിർബന്ധം നല്ലതല്ല . കാരണം അനുഭവങ്ങളിലൂടെ കഥമെനയുന്ന കൂട്ടരും ഇവിടെ ചെറുതല്ല . അതുകൊണ്ട് വായന ഞാൻ വ്യക്തിപരമാണെന്ന് വിശ്വസിക്കുന്നു .
വിദ്യാലയം
സജീവ്കുമാർ ശശിധരൻ
ലോകമതുവിദ്യാലയം
കാതമെവിടെപ്പോകണം
നിൻ്റെ ജനനംമുതൽ
പിന്നെ മരണം വരെ
പുൽക്കൊടികളും അധ്യാപകർ .
പിന്നെ നീയും അധ്യാപകൻ .
നര
സജീവ്കുമാർ
ഹോ , നര
തട്ടിയും താഴാതെ
നോക്കി ചിരിക്കുന്നു .
നെഞ്ചിൽ പിണർ
എനിക്കും വയസ്സേറിയോ .
പിഴുതെറിഞ്ഞാലോ ?
ഇനിയും കിളിച്ചാലോ ?
വേണ്ട !
വെട്ടി നിരത്താം
കറുപ്പടിക്കാം .
ഇവ്വണ്ണം ഓരോന്നും
ഓർത്തൊരൻ കണ്ണിലായ്
വീണ്ടുമോരുനര !
വന്നിളിച്ചുനിന്നു .
സമയം പറഞ്ഞെന്നെ
വയസ്സും പറഞ്ഞെന്നെ
കളിയാക്കി .
ഇത് കേസാക്കണം .
നല്ല നടപ്പിന്
നാലുകൊല്ലം
നാടുകടത്തണം
ഓടിടട്ടെ .
കാറ്റും കഥയും
സജീവ്കുമാർ ശശിധരൻ
കാറ്റിന്നുവന്നൊരു
കഥ പറഞ്ഞു .
ചെവിയോട് ചേർന്ന്
കഥ പറഞ്ഞു .
നരനോട് പറയണ്ട
നല്ലതൊന്നും
ചന്ദനം പൂക്കുന്ന
കാടുകണ്ടു .
കരിയുണ്ട് ,നരിയുണ്ട്
കരടിയുണ്ട് .
കള കള മൊഴുകുന്ന
അരുവിയുണ്ട് .
ഓടുന്ന ചാടുന്ന
മാനുണ്ട് മയിലുണ്ട്
ഹാ .. സുന്ദരം
എന്ത് ഭംഗിയാണ് .
നരനോട് പറയണ്ട
നല്ലതൊന്നും .
നാളെയുമൊന്നങ്ങ്
പോയിടേണം .
നല്ല വെളിച്ചത്തിലൊന്നുകൂടി
കൺകുളിർക്കെ
എല്ലാം കണ്ടിടേണം .
ഒരു പ്രണയം
സജീവ്കുമാർ ശശിധരൻ
എന്തേ നനഞ്ഞു
ഞാൻ മാത്രം
ആ മഴ പെയ്യ്തതാൽ
എൻ മിഴിച്ചാലുകൾ
അറിഞ്ഞില്ല പെണ്ണേ
നീയും
കനവും നിറഞ്ഞുനീ
മനവും നിറഞ്ഞുനീ
മൊഴിയിൽ വന്നില്ല
പെണ്ണേ
കത്തുകൾ കൊണ്ടെന്റെ
ഹൃദയം തുറക്കുവാൻ
വിറയോടെ പലവട്ടം
നിന്നു .
ഒന്നിനുമായില്ല
ഒന്നും പറഞ്ഞില്ല
ഒന്നുമറിയാതവൾ
പോയി.
എന്റെ കരളുമായ്
അവളെങ്ങോ പോയി .
അറിയാതെ പറയാതെ
പോയി .
ഇന്ന്
സജീവ്കുമാർ ശശിധരൻ
വോട്ടുപെട്ടിയിൽ
അന്ന് വീണത്
കൂട്ടിനോക്കും
കാലമാ .
കാശുവാങ്ങി
കുത്തി നോക്കി
കുത്തുവാങ്ങും
കാലമാ
നന്മയുള്ള
ലോകമാ
നന്മ നാവിൽ
മാത്രമാ
കണ്ടു കാണാതങ്ങ്
പോകിൽ
നാളെ നീട്ടാം
ജീവിതം
ജീവിതം
സജീവ്കുമാർ ശശിധരൻ
ചിറകുവിരിപ്പിച്ചു
ദൂരേക്ക് പോകണം
കടലാസ് കീറുകൾ
ഒരുപാടുകൂട്ടണം .
ഓണം വരും പോലെ
മാവേലിയാകണം
ആളുകേറാമല
വാങ്ങിച്ചുകൂട്ടണം .
വെട്ടിയ വഴിയത്
അറ്റമില്ലാത്തത്
വട്ടുകളൊക്കെ
വടം വലിക്കുന്നത് .
അങ്ങനെ ഇങ്ങനെ
ചാടിത്തിമിർത്തിട്ട്
എന്തോ സൊരുകൂട്ടി
ഓളും പ്രതാപവും .
രണ്ടും മറന്നിപ്പൊ
എല്ലാം നരച്ചിപ്പോ.
അന്നും മറന്നുപോയ്
ഇന്നും മറന്നുപോയ് .
